Af hverju

Ég get ekki orða bundist lengur. Í garð er genginn einn
auglýsingaþyngsti tími ársins og það gefst ekki betri tímasetning til þess að byrja að tjá sig um efni þeirra.

Ég er alin upp í bransanum. Móðir mín og bróðir reka með
starfsfélaga sínum nokkuð stóra og öfluga auglýsingastofu og hafa gert síðastliðin 13 ár. Alla mína hunds- og kattartíð hefur umfjöllun á heimilinu meðal annars verið um auglýsingar, markaðssetningu og skynsama beitingu almannatengsla.

Atvikið

Frægt er orðið (innan takmarkaðs hóps) orrahríð mín við
framkvæmdastjóra auglýsingastofu fyrr í haust, vegna þess sem ég hef kallað augljósan ritstuld og fjallað er um í þönkum mínum undir yfirskriftinni afritun og eftirgerð en látum það atvik liggja á milli hluta og einbeitum okkur að framtíðinni.

Afleiðingarnar

Þar hefurðu það, hér á þessum síðum áttu örugglega eftir að sjá mínar athugasemdir um auglýsingar sem birst hafa á prenti eða
varpmiðlum. Jafnvel dreifiefni sem berst inn um lúguna eða hringingar sem áreita mig um leið og maturinn er lagður á borðið.